සිනා මල් ගොඩක් පාර දෙපැත්තේ..

සිනා මල් ගොඩක් පාර දෙපැත්තේ 

නෙලා ගන්න හිතයි දෝතට මල් කොහොම වටින්නේ

කඳුළු මල් ගොඩක් පාර දෙපැත්තේ 

නෙලා ගන්නෙපා මගේ පුංචි මල් කුමාරියේ

සිනා මල් ගොඩක්... නෑ කඳුළු මල් ගොඩක්

බලන්න ආසයි බටහිර සැන්දෑ අහසේ 

ඉගිල්ලෙන්න ද  මම කුමාරියක් වාගේ අම්මේ

ඒ අහසේ සුළං කපොළු විදුලි අකුණු මන්දාරම්

මේ විශ්වයේ රටාව තව නෑ දූ දන්නේ

අහන්න ආසයි තුරු හිස කුරුළු ගී පිරේ 

අහුලා ගන්නද සවනට මිහිරියි  අම්මේ

අහුලා ගන්න ද ඒ ගී සවනට මිහිරියි අම්මේ

ගෙයෙනා මුතු කැට පදවැල් සීරෙන විට කඳුළු පිරෙයි

ඒ  ගී උල්පත් ගැන නෑ මගේ දූ දන්නේ...

සිනා මල් ගොඩක්... නෑ කඳුළු මල් ගොඩක්

ඇයට තවමත් හරියට තේරුම් කරගන්න බැහැ හොඳ මිනිස්සු කවුද නරක මිනිස්සු කවුද කියලා. මතුපිටින් සුන්දර පෙනෙන ඕන දෙයක් සිනා මල් ගොඩක් විදිහට බාරගන්න දෝණි දෙපාරක් නොහිතන්නේ ඒකයි.ඇයගේ සිත මල් පෙත්තක තරමට සිනිදු උනාට, හා පැටියෙක් තරමට  අහිංසක උනාට ඇය වටේ ඉන්න  හැමෝම එහෙම නෑ කියල තේරුම්  ගන්න තවමත් ඇයට අත්දැකීම් මදි.ඒත් මේ දෝණිගේ අම්මා ඇයට වඩා ගොඩාක් අත්දැකීම් පිරුණ කෙනෙක්. ඒකයි ඇය දෝණිව පරිස්සම් කරගන්නේ සිනා මලක් වගේ පෙනෙන හැම මායවකටම  රැවටෙන්න ඉඩ නොදී.

                            

නිදහස ලැබුන ගමන් දෝණිටත් ඕන කිරිල්ලයක් වගේ පියාඹන්න. හැම  අලුත්  අත්දැකීමක්ම විඳින්න. ඒත් නිල් අහසට ගිහින් පියාඹන්න තටු  ගහන්න විතරක් දැනගෙන හිටියට මදි කියලා දෝණිට තේරුමක් නෑ. ඈතට ලස්සන නිල් අහසක් වගේ පෙනුනට සුලං කපොලු, විදුලි අකුණු, මන්දාරම් ගොඩාක් ඒ ලස්සනට  යටින් තියෙනවා. ඒ වගේ තමයි  ඇයගේ ජීවිතේ ඉදිරිය අවුරාගෙන එන බාධකත්. ඒ බාධක වලට මුහුණ  දෙන  හැටි ඇය තවත් ඉගෙන ගන්න ඕන. ඒකයි කතාවටත් කියන්නේ දැන ගියොත් කතරගම, නොදැන ගියොත් අතරමග කියලා.

ගොඩාක් අය ඇවිත් හුඟාක් මිහිරි වචන ඇයට කියාවි. ගොඩාක් සුන්දරයි වගේ පෙනෙන අදහස් ඇයගේ  තැලිල පොඩි නොවුන සිතට තේරුම් කරවන්න උත්සාහ කරාවි. දේදුණු පාට හීන ගොඩක් ඇගේ  ඇස් ඉස්සරහ මවලා පෙන්වාවි. දෝණිත් ඒවට රැවටෙවි.ඒ හීන වල පාට හරි ඉක්මණට වියැකිලා ගියාම ඇයට පසු  තැවෙන්න වේවී. එදාට   ඇයගේ ඇස් වල කඳුලු වලට ඉවරයක් නැතිවේවි. අමාරුවෙන් මුතු කැට  එකින් එක අමුණලා හදපු මුතු වැලක් එක නිමේෂයකින් ඉහිරිලා ගියාම  දැනෙන දුක වගේ, ඇයගේ හීනත් ඉහිරිලා ගියාම  ඇය දුක් වෙනකොට. අම්මට බැහැ දෝණිගේ නිල් පාට ඇස් වල කඳුලු කැට බලන්න. ඊට කලිනුයි අම්මා ඇයට කියලා දෙන්නේ ලස්සනට පේන හැමදෙකටම ජීවිතේට පිවිසෙන්න ඉඩ දෙන එක ගොඩක් අවදානම් කියලා.

ඉදින් දෝණිට ලෝකේ දැකල, බලලා, අහලා තේරුම් කරගන්න දෙවල් ගොඩාක් තියෙනවා. ඒ හැම දෙයකම හොඳ නරක වෙන් කරගෙන පොලොවේ පය ගහල ජීවත් උනොත් , දෝණිගේ ජීවිතේත් හැමදම සිනා මල් ගොඩක්ම වේවී!!

--චමෝදි විතානගේ--

කතෘගේ අවසරයකින් තොරව උපුටා ගැනීම බුද්ධ්මය දේපළ පණත යටතේ දඬුවම් 

ලැබිය හැකි වරදකි. උපුටා ගැනීම, ඡායා පිටපත් ගැනීම හෝ විද්‍යුත් මාධ්‍යකින් ගබඩා කර ගැනීම හෝ පළ කිරීම සපුරා තහනම්ය.

සියළුම හිමිකම් ඇවිරිණි.